रिलायबल क्यापिटल इन्भेष्टमेन्ट एण्ड मर्चेन्टले वैशाख २९ गतेदेखि बिक्री खुला गरेको सामूहिक लगानी कोष ‘रिलायबल समृद्धि योजना–२’ मा आवेदन दिने अवधि थप गरिएको छ।
अब लगानीकर्ताले यस योजनाको इकाई खरिदका लागि जेठ १२ गतेसम्म आवेदन दिन सक्नेछन्। मागभन्दा बढी आवेदन परेमा भने सो मितिअगावै सूचना प्रकाशित गरी निष्काशन बन्द गरिने क्यापिटलले जनाएको छ।
रिलायबल म्युचुअल फण्ड अन्तर्गत सञ्चालन हुने यो १० वर्षे बन्दमुखी योजना हो। क्यापिटलले प्रतिइकाई १० रुपैयाँ अंकित मूल्यमा कुल १० करोड इकाई अर्थात् एक अर्ब रुपैयाँ बराबरको इकाई बिक्रीमा ल्याएको हो।
कुल निष्काशनमध्ये १५ प्रतिशत अर्थात् १ करोड ५० लाख इकाई सुरक्षित गरिएको छ। यसमध्ये १ करोड ४० लाख इकाई कोष प्रवर्द्धक रिलायबल नेपाल लाइफ इन्स्योरेन्स लिमिटेडलाई र १० लाख इकाई योजना व्यवस्थापकलाई छुट्याइएको छ। बाँकी ८ करोड ५० लाख इकाई सर्वसाधारणका लागि खुला गरिएको हो। लगानीकर्ताले न्यूनतम १०० इकाईदेखि अधिकतम १ करोड इकाईसम्म आवेदन दिन सक्नेछन्।
यस योजनाको धितोपत्र निष्काशन तथा बिक्री प्रबन्धक रिलायबल इन्भेष्टमेन्ट एण्ड मर्चेन्ट क्यापिटल लिमिटेड रहेको छ। स्वीकृत आस्बा सदस्य बैंक तथा वित्तीय संस्था तथा तिनका शाखामार्फत आवेदन दिन सकिनेछ। साथै, मेरो सेयरमार्फत सि–आस्बा प्रणाली प्रयोग गरेर पनि आवेदन दिन सकिने व्यवस्था छ।
क्रेडिट रेटिङ संस्था केयर रेटिङ्स नेपाल लिमिटेडले कोष प्रवर्द्धकलाई ‘केयर–एनपी सिंगल ए माइनस इस्युअर रेटिङ’ तथा योजना व्यवस्थापकलाई ‘केयर–एनपी एएमसी क्वालिटी ४ प्लस’ रेटिङ प्रदान गरेको छ।
