भारत भ्रमणमा रहेका रास्वपा सभापति रवि लामिछाने र भारतका गृहमन्त्री अमित शाहबीच आज (मंगलबार) भेटवार्ता हुने भएको छ। रास्वपा प्रवक्ता मनिष झाका अनुसार लामिछाने नेतृत्वको प्रतिनिधिमण्डलले भारतीय गृहमन्त्री शाहसँग भेट गर्ने भएको हो।
उनले नेपाल-भारत सम्बन्ध, आपसी हित, लोकतान्त्रिक अभ्यास, सुरक्षा सहकार्य तथा दुई देशका राजनीतिक दलहरूबीचको संवाद र सहकार्यका विषयमा विचार विमर्श हुने अपेक्षा गरिएको जानकारी दिए। पाँचदिने औपचारिक भ्रमणका लागि लामिछानेसहितको प्रतिनिधिमण्डल सोमबार दिल्ली पुगेको हो।
यसअघि नयाँ दिल्लीस्थित भारतीय जनता पार्टी (भाजपा) को कार्यालयमा लामिछानेलाई स्वागत गरिएको थियो। लामिछानेको स्वागतमा भाजपा कार्यालयमा रातो कार्पेट बिछ्याएर बाजागाजासहित स्वागत गरिएको थियो।
त्यसक्रममा भाजपा अध्यक्ष नितिन नवीन र सभापति लामिछानेबीच विभिन्न उपहार आदानप्रदान भएको छ। लामिछानेले अध्यक्ष नितिन नवीनलाई रुद्राक्षको माला लगाइदिएका छन्।
सत्तारूढ भाजपाको निमन्त्रणामा सोमबार दिल्ली गएका लामिछानेले आजदेखि उच्चस्तरीय भेटवार्ता सुरु गरेका छन्। लामिछाने जेठ २२ गतेसम्म भारतमै रहने तालिका छ।
भेटघाट, छलफल तथा भ्रमणका लागि नयाँदिल्लीस्थित नेपाली दूतावासले समन्वय गरेको छ। भ्रमणका क्रममा लामिछाने अयोध्या जाने कार्यक्रम पनि छ।
सभापति लामिछाने नेतृत्वको प्रतिनिधिमण्डलमा उनकी धर्मपत्नी निकिता पौडेल, रास्वपाका सहमहामन्त्री विपिनकुमार आचार्य, रास्वाका सचिवालय सदस्य दीपक बोहरा र स्वकीय सचिव प्रदीप आचार्य सहभागी छन्।
