साताको अन्तिम कारोबार दिन बिहीबार नेपाल स्टक एक्सचेञ्ज (नेप्से) परिसूचक १३.८२ अंकले ओरालो लाग्दै २ हजार ६५४.८० बिन्दुमा पुगेको छ।
कारोबार अवधिभर बजारमा बिक्री दबाब कायम रहँदा अधिकांश समय परिसूचक नकारात्मक रह्यो। आज ६४ कम्पनीको शेयर मूल्य बढ्दा २०२ कम्पनीको मूल्य घट्यो भने १० कम्पनीको मूल्यमा कुनै परिवर्तन भएन।
कारोबार रकम भने अघिल्लो दिनको तुलनामा सामान्य वृद्धि भएको छ। बुधबार ४ अर्ब ४० करोड रुपैयाँ बराबरको कारोबार भएको बजारमा बिहीबार ४ अर्ब ६२ करोड रुपैयाँको शेयर किनबेच भएको छ।
समूहगत सूचकतर्फ व्यापार समूहबाहेक सबै उपसूचक राताम्मे भए। व्यापार समूह ०.५९ प्रतिशतले उकालो लाग्दा बैंकिङ, विकास बैंक, फाइनान्स, होटल तथा पर्यटन, जलविद्युत्, लगानी, जीवन बीमा, उत्पादन तथा प्रशोधन, माइक्रोफाइनान्स, निर्जीवन बीमा र अन्य समूहमा गिरावट देखियो।
कारोबार रकमका आधारमा जलविद्युत् समूह सबैभन्दा सक्रिय रह्यो। यस समूहमा २ अर्ब ४७ करोड रुपैयाँभन्दा बढीको कारोबार हुँदा वाणिज्य बैंकमा ४९ करोड ८२ लाख, विकास बैंकमा ३१ करोड र फाइनान्स समूहमा २७ करोड रुपैयाँ बराबरको कारोबार भएको छ।
व्यक्तिगत कम्पनीतर्फ अपर लोहोरेखोला हाइड्रोपावरको शेयर मूल्य करिब १५ प्रतिशतले बढ्दै सर्वाधिक लाभ कमायो। कालंगा हाइड्रोपावर र सानीगढ हाइड्रोपावरको मूल्य पनि बढ्यो।
कारोबार रकमका आधारमा रिडी पावर, आँखुखोला जलविद्युत्, सोलु हाइड्रोपावर, नेसनल हाइड्रोपावर र खानीखोला हाइड्रोपावर अग्रस्थानमा रहे।
