काठमाडौं। साताको कारोबारको चौथो दिन बुधबार सेयर बजारमा सामान्य गिरावट देखिएको छ। नेप्से परिसूचक ०.२६ अंकले घटेर २ हजार ६२२ अंकमा झरेको छ। अघिल्लो कारोबार दिन बजार १९.३४ अंकले घटेको थियो।
बजार परिसूचकमा खासै परिवर्तन नआए पनि कारोबार रकम भने उल्लेख्य घटेको छ। मंगलबार ५ अर्ब ७ करोड रुपैयाँ बराबरको सेयर कारोबार भएकोमा बुधबार कारोबार रकम ३ अर्ब २९ करोड रुपैयाँमा सीमित भएको छ। अघिल्लो दिनको तुलनामा कारोबार रकम १ अर्ब ७८ करोड रुपैयाँ कम हो।
बुधबार ११० कम्पनीको सेयर मूल्य उकालो लाग्दा १५० कम्पनीको मूल्य घटेको छ। १८ कम्पनीको सेयर मूल्य भने अघिल्लो दिनकै स्तरमा कायम रह्यो।
कारोबारमा आएका सबै समूहगत सूचकमा १ प्रतिशतभन्दा कम उतारचढाव देखिएको छ। बैंकिङ समूह ०.०६ प्रतिशत, जलविद्युत् ०.०९ प्रतिशत, निर्जीवन बीमा ०.१४ प्रतिशत, अन्य समूह ०.१२ प्रतिशत र व्यापार समूह ०.७६ प्रतिशतले बढेका छन्।
यता विकास बैंक ०.०२ प्रतिशत, वित्त ०.२२ प्रतिशत, होटल तथा पर्यटन ०.३८ प्रतिशत, लगानी ०.२८ प्रतिशत, जीवन बीमा ०.३१ प्रतिशत, उत्पादन तथा प्रशोधन ०.०४ प्रतिशत र लघुवित्त ०.३३ प्रतिशतले ओरालो लागेका छन्।
कारोबार रकमका आधारमा जलविद्युत् समूह अगाडि रह्यो। उक्त समूहमा मात्रै १ अर्ब ८४ करोड रुपैयाँ बराबरको कारोबार भएको छ। वाणिज्य बैंक समूहमा ३७ करोड तथा उत्पादन तथा प्रशोधन समूहमा ३५ करोड रुपैयाँ बराबरको कारोबार भएको छ।
