९ भदौ ललितपुर । सरु संगीत घर, टिकाथली, ललितपुरले यस वर्षको सरु संगीत राष्ट्रिय पुरस्कार-२०८३ वरिष्ठ गायिका मीरा राणालाई प्रदान गर्ने निर्णय गरेको छ । नेपाली आधुनिक गीत–संगीतको क्षेत्रमा विगत ६ दशकदेखि पु-याउँदै आएको अतुलनीय योगदानको कदरस्वरूप राणालाई उक्त पुरस्कार प्रदान गर्न लागिएको हो ।
पुरस्कारको राशि २५ हजार ५०५ रुपैयाँ रहेको विज्ञप्तिमा उल्लेख छ । नेपाली गीत-संगीतको क्षेत्रमा योगदान पु¥याउने महिला कलाकारलाई प्रोत्साहन गर्ने उद्देश्यले स्थापित पुरस्कारका लागि पाँच लाखको अक्षयकोष स्थापना गरिएको छ ।
संगीतकार कोमल निरौलाको संयोजकत्वमा गठित स्वतन्त्र छनोट समितिले राणाको नाम पुरस्कारका लागि सर्वसम्मत रूपमा चयन गरेको हो । समितिमा वरिष्ठ गायक तथा संगीतकार सूर्य थुलुङ, वरिष्ठ गायिका लोचन भट्टराई, लेखक डा। रत्नमणि नेपाल र सदस्य-सचिव डेनी निरौला सदस्य रहेका छन् ।
राणा सरु संगीत राष्ट्रिय पुरस्कार प्राप्त गर्ने दोस्रो साधक हुन् । यसअघि २०८२ सालमा प्रसिद्ध लोकगायिका कविता आलेलाई पहिलो पटक यो पुरस्कार प्रदान गरिएको थियो ।
पुरस्कारका लागि स्वदेश तथा विदेशमा रहेर नेपाली गीत-संगीतको क्षेत्रमा विशिष्ट योगदान पु¥याएका ४० वर्ष उमेर पूरा गरेका नेपाली महिला योग्य हुने व्यवस्था छ । यस वर्षको पुरस्कार असोज १० गते शनिबार सरु संगीत घरको छैटौँ वार्षिक कार्यक्रममा प्रदान गरिनेछ । महालक्ष्मी नगरपालिका-५, ललितपुरमा रहेको सरु संगीत घरले विगत ६ वर्षदेखि संगीतका क्षेत्रमा सैद्धान्तिक तथा व्यावहारिक शिक्षा प्रदान गर्दै आएको छ । संस्थामा हाल गायन तथा वाद्यवादनलगायत विभिन्न विधामा करिब १०० विद्यार्थीले संगीत शिक्षा लिइरहेका छन् ।
