काठमाडौं । लक्ष्मी सनराइज बैंकले साउन १४ गतेदेखि ऋणपत्र निष्काशन गर्ने भएको छ ।
बैंकले बार्षिक ७ प्रतिशत ब्याज पाइने गरी १० वर्ष अवधिका लागि ‘७ प्रतिशत लक्ष्मी सनराइज डिबेञ्चर २०९२’ निष्काशन गर्न लागेको हो ।
बैंकले प्रतिइकाई एक हजार रुपैयाँका दरले ३ अर्ब रुपैयाँको ३० लाख कित्ता ऋणपत्र निष्काशन गर्न लागेको हो । जसमा ६० प्रतिशत अर्थात १ अर्ब ८० करोड रुपैयाँ बराबरको १८ लाख इकाइ व्यक्तिगत रुपमा बाँडफाँट गरिनेछ । यस्तै बाँकी ४० प्रतिशत अर्थात १ अर्ब २० करोड रुपैयाँको १२ लाख कित्ता सर्वसाधारणलाई निष्कासन गरिने छ ।
सर्वसाधारणका लागि निष्कासन गरिने ऋणपत्रमा ५ प्रतिशत अर्थात ६० हजार इकाइ सामूहिक लगानी कोषका लागि छुट्याइएको छ।
ऋणपत्रमा लगानीकर्ताले न्यूनतम २५ देखि अधिकतम सम्पूर्ण कित्तामा आवेदन दिन सकिने छ । ऋणपत्रमा छिटोमा साउन १९ गतेसम्म आवेदन दिन सकिने छ । उक्त अवधिमा माग अनुसार आवेदन नपरेको खण्डमा साउन २८ गतेसम्म आवेदन दिन सकिने छ ।
यसको धितोपत्र निष्काशन तथा बिक्री प्रबन्धकमा माछापुच्छ्रे क्यापिटल रहेको छ । लगानीकर्ताले धितोपत्र बोर्डबाट स्वीकृती प्राप्त सी–आश्वा सदस्य रहेका बैंक तथा वित्तीय संस्थाहरु र मेरो सेयर मार्फत आवेदन दिन सकिने छ ।
