साताको कारोबारको दोस्रो दिन मंगलबार सेयर बजार परिसूचक नेप्से दोहोरो अंकले घटेको छ।
नेपाल स्टक एक्सचेञ्ज (नेप्से)का अनुसार आज नेप्से परिसूचक १९ दशमलव ३४ अंकले घटेर २ हजार ६२२ दशमलव ४८ विन्दुमा झरेको छ।
ठूला कम्पनीको कारोबार मापन गर्ने सेन्सेटिभ परिसूचक २ दशमलव ५५ अंकले घटेर ४६१ दशमलव ०९ विन्दुमा पुगेको छ। फ्लोट परिसूचक १ दशमलव ३० अंकले घटेर १७९ दशमलव ९७ विन्दुमा पुगेको छ भने सेन्सेटिभ फ्लोट परिसूचक शून्य दशमलव ८८ अंकले घटेर १५५ दशमलव ७६ विन्दुमा कायम भएको छ।
आज कुल १ करोड ५१ लाख ९६ हजार ९८२ कित्ता सेयर किनबेच हुँदा कारोबार रकम ५ अर्ब ७ करोड ३५ लाख १८ हजार ६६२ रुपैयाँ पुगेको छ।
कारोबारमा रहेका १३ उपसमूहमध्ये एउटा उपसमूहको परिसूचक बढेको छ भने १२ उपसमूहको परिसूचक घटेको छ।
आज ५६ कम्पनीको सेयर मूल्य बढेको छ भने २१८ कम्पनीको सेयर मूल्य घटेको छ। पाँच कम्पनीको सेयर मूल्य भने स्थिर रहेको नेप्सेले जनाएको छ।
आज सर्वोत्तम पेन्ट्स इन्डस्ट्रिज, माउन्ट एभरेस्ट पावर डेभलपमेन्ट कम्पनी र मनकामना इन्जिनियरिङ हाइड्रोपावर कम्पनीका लगानीकर्ताले कमाएका छन्।
त्यस्तै, सगरमाथा जलविद्युत् कम्पनी, खानीखोला हाइड्रोपावर र सिद्धार्थ इक्विटी फन्डका लगानीकर्ताले बढी गुमाएका छन्।
