सत्तारुढ राष्ट्रिय स्वतन्त्र पार्टी (रास्वपा) की सांसद इन्दिरा राना मगरले राष्ट्रिय बाल अधिकार परिषद् खारेज गर्ने निर्णय तत्काल फिर्ता लिन सरकारसँग माग गरेकी छन्।
बिहीबार प्रतिनिधि सभा बैठकमा बोल्दै सांसद मगरले अघिल्लो सरकारले यो निर्णय गरेको भन्ने सुनिन आएको उल्लेख गर्दै अब सरकारले पुनर्विचार गर्न आवश्यक रहेको बताइन्। बालबालिकाको हक, हित र संरक्षणका लागि वैकल्पिक व्यवस्था समेत नगरी सरकारले परिषद खारेज गरेको भन्दै उनले आक्रोश व्यक्त गरिन्।
‘राष्ट्रिय बाल अधिकार परिषद् खारेज गर्ने अघिल्लो सरकारको निर्णय भन्ने सुनिन आएको छ। बाल अधिकार संरक्षण, बालबालिकाको हक अधिकार जस्ता संवेदनशील विषयलाई मध्यनजर गर्दै कुनै पनि स्पष्ट वैकल्पिक संरचना तथा प्रभावकारी व्यवस्था सुनिश्चिन नभएसम्म उक्त निर्णय तत्काल कार्यान्वयन नगर्न नेपाल सरकारको गम्भिर ध्यानाकर्षण गराउन चाहन्छु’ उनले भनिन्, ‘यस विषयमा सरोकारवालासँग व्यापक परामर्श गरी पुनर्विचारका लागि सरकारसँग आग्रह गर्दछु।’
सांसद मगरले सरकारले बालबालिकाको संरक्षणको विषयलाई गम्भिर विषयको रुपले लिएर आवश्यक कदम चाल्नुपर्ने समेत स्पष्ट पारिन्।
