गृहमन्त्री सुधन गुरुङ सुनसरी जाने भएका छन्। जिल्लाको पछिल्लो सुरक्षा अवस्थाबारे प्रधानमन्त्री बालेन शाहसँग छलफल गरेपछि उनी त्यसतर्फ जान लागेका हुन्।
प्रधानमन्त्री तथा मन्त्रिपरिषद्को कार्यालयमा प्रधानमन्त्रीसँग भेटवार्ता सम्पन्न गरेर गृहमन्त्री गुरुङ केहीबेरअघि त्यहाँबाट बाहिरिएका थिए।
प्रधानमन्त्रीका प्रेस सहजकर्ता सुरेन्द्र बजगाईंका अनुसार प्रधानमन्त्रीसँगको परामर्शपछि गृहमन्त्रीले सुनसरीका जनप्रतिनिधिसँग समन्वय गर्दै घटनास्थलतर्फ जाने तयारी गरेका छन्।
‘प्रधानमन्त्रीसँगको छलफलपछि गृहमन्त्रीज्यू सुनसरी जान लाग्नुभएको हो,’ बजगाईंले भने।
सुनसरीमा पछिल्ला घटनापछि उत्पन्न सुरक्षा अवस्था, स्थानीय जनप्रतिनिधिसँगको छलफल तथा शान्ति–सुरक्षा व्यवस्थापनका विषयमा आवश्यक समन्वय गर्न गृहमन्त्री त्यसतर्फ जान लागेको जनाइएको छ।
