विश्वप्रसिद्ध नेपाली पर्वतारोही निर्मल पूर्जा ‘निम्सदाइ’को पाकिस्तानस्थित ब्रोड पिकमा गएको हिमपहिरोमा परी निधन भएको उनकाे अभियानसँग सम्बन्धित टोलीले जनाएको छ। टोलीले सार्वजनिक गरेको शोक वक्तव्यमा पुर्जासँगै उनका विश्वसनीय आरोहण सहयोगी पुरबहादुर गुरुङ (युक्ता) र नीमा शेर्पाको पनि उक्त दुर्घटनामा ज्यान गएको उल्लेख गरिएको छ।
वक्तव्यमा हिमपहिरोपछि प्राप्त पुष्टिका आधारमा तीनै जनाको निधन भएको जनाउँदै यस घटनाले पर्वतारोहण क्षेत्रले एक असाधारण आरोही, प्रेरणादायी नेता र साहसी व्यक्तित्व गुमाएको उल्लेख गरिएको छ । टोलीले पुर्जाले आफ्नो साहस, विनम्रता र अटल आत्मविश्वासमार्फत विश्वभरका लाखौं मानिसलाई ठूलो सपना देख्न र आफ्नो सीमाभन्दा माथि उठ्न प्रेरित गरेको जनाएको छ।
वक्तव्यमा पुर्जाको नेतृत्वमा स्थापित एलिट एक्स्पेड, निम्सदाइ फाउन्डेसन, स्काइडाइभ निम्सदाइ तथा निम्सदाइ स्टोरजस्ता संस्थामार्फत उनले सिर्जना गरेको विरासत आगामी पुस्ताका लागि पनि प्रेरणाको स्रोत बन्ने विश्वास व्यक्त गरिएको छ।
घटनामा ज्यान गुमाउने सबैप्रति श्रद्धाञ्जली अर्पण गर्दै टोलीले शोकसन्तप्त परिवारजन, आफन्त र शुभेच्छुकप्रति गहिरो समवेदना प्रकट गरेको छ। साथै उद्धार तथा खोजी कार्यमा खटिएका सबै टोलीप्रति आभार व्यक्त गर्दै परिवारको गोपनीयताको सम्मान गर्न सबैसँग आग्रह गरिएको छ।
टोलीसँग अन्तिम सम्पर्क बिहीबार बिहान भएको थियो। त्यसै दिन साँझ शक्तिशाली हिमपहिरो आएको खबर सार्वजनिक भएको थियो । आरोहीहरूको ट्र्याकिङ उपकरणबाट प्राप्त तथ्यांकले उनीहरू हिमपहिरोले सयौं मिटर तलसम्म बगाएको देखाएको छ ।
