साउन २० गते काभ्रेको भुम्लु गाउँपालिका–८ दुलालेश्वर महादेव मन्दिर छेउबाट सुनकोसीमा हेलिएका वृद्ध दम्पतीमध्ये महिलाको शव फेला परेको छ।
मण्डनदेउपुर नगरपालिका–७ की ६७ वर्षीया तिलकुमारी पराजुलीको शव ओखलढुंगाको सीमास्थित सुनकोसी नदीमा फेला परेको प्रहरीले जनाएको छ।
उनीसँगै नदीमा हेलिएका पति वर्ष ६८ का केदारनाथ पराजुलीको खोजी कार्य जारी छ।
बुधबार (२० साउन) साँझ काभ्रेको भुम्लु गाउँपालिका–८ दुलालेश्वर महादेव मन्दिर छेउबाट दम्पती सुनकोसीमा हेलिएका थिए।
तिलकुमारी बोनम्यारो क्यान्सर भई अपाङ्ग थिइन् भने केदारलाई प्रोस्टेटको समस्या थियो।
जिल्ला प्रहरी कार्यालय काभ्रेका डीएसपी रविन विष्टकाअनुसार पराजुली दम्पतीको खोजीमा नेपाल प्रहरी र सशस्त्र प्रहरीको गोताखोरसहित र्याफ्टिङ टोली पनि परिचालन गरिएको छ।
केदारनाथले श्रीमती तिलकुमारीलाई पिठिउँमा बोकी दोलालघाट पुगेको सीसीटीभी फुटेजमा देखिएको छ। श्रीमतीलाई बोकेर दोलालघाट पुगेका केदारनाथले श्रीमतीसहित सुनकोसी नदीमा हाम फालेको स्थानीयको भनाई छ।
