काठमाडौं। नेपाली राष्ट्रिय क्रिकेट टोलीका नवनियुक्त कप्तान सन्दीप लामिछानेले निवर्तमान कप्तान रोहित पौडेललाई धन्यवाद दिएका छन्।
कप्तानबाट नेपाल क्रिकेट संघ क्यानले सोमबार हटाएपछि रोहितले टोलीका लागि गरेको योगदान, प्रतिबद्धता र नेतृत्वको प्रशंसा गर्दै सन्दीपले सामाजिक सञ्जालमार्फत धन्यवाद दिएका हुन्।
‘टोलीका लागि तपाईंले गर्नुभएको सबै काम र हरेक क्षणमा हामीलाई नेतृत्व गर्नुभएकोमा धन्यवाद रोहित भाइ,’ सन्दीपले लेखेका छन्।
सन्दीपले रोहितको योगदान, प्रतिबद्धता र टोलीमा उनको उपस्थितिलाई सधैँ मूल्यवान् रहने उल्लेख गर्दै आगामी दिनमा पनि नेपाली टोली र देशका लागि रोहितबाट अझै धेरै योगदान हुने विश्वास व्यक्त गरेका छन्।
नेपाल क्रिकेट संघले सोमबार सन्दीप लामिछानेलाई पुन: राष्ट्रिय टोलीको नयाँ कप्तान नियुक्त गरेको थियो।
