अमेरिकी सरकारले नेपाली नागरिकलाई दिँदै आएको टेम्पोररी प्रोटेक्टेड स्टाटस (टीपीएस) सुविधा अन्त्य गर्ने निर्णय गरेको छ ।
अमेरिकी आप्रवासन सेवाका अनुसार नेपालको टीपीएस सुविधा एक वर्षअघि नै सकिएको थियो । तर, त्यसलाई फेरि कायम राख्ने वा पूर्ण रूपमा अन्त्य गर्ने भन्ने निर्णय हुन बाँकी थियो ।
अमेरिकी सरकारले अहिले नेपालका लागि टीपीएस कायम राख्नुपर्ने कानुनी आधार नरहेको भन्दै सुविधा अन्त्य गर्ने निर्णय गरेको हो ।
टीपीएसका कारण अमेरिकामा रहेका योग्य नेपालीले निश्चित समयसम्म कानुनी रूपमा बस्न र काम गर्न पाउने तथा देशनिकालाबाट अस्थायी सुरक्षा पाउने व्यवस्था थियो । अब टीपीएस समाप्त भएपछि अन्य कुनै वैध आप्रवासन हैसियत नभएका नेपालीले अमेरिका छाड्नुपर्ने अवस्था आउन सक्छ ।
अमेरिकाले नेपालसँगै हाइटी, सिरिया, यमन, अफगानिस्तान, क्यामरुन, होन्डुरस, निकारागुआ, भेनेजुएला, दक्षिण सुडान, म्यानमार, सोमालिया र इथियोपियालगायत देशका नागरिकको टीपीएस पनि अन्त्य गर्ने निर्णय गरेको छ ।
टीपीएस युद्ध, प्राकृतिक विपत्ति वा अन्य असाधारण परिस्थितिका कारण तत्काल आफ्नो देश फर्कन नसक्ने विदेशी नागरिकलाई अमेरिकाले दिने अस्थायी कानुनी सुरक्षा हो ।
