काठमाडौं। नुवाकोटको शिवपुरी गाउँपालिका–७ थानाभञ्ज्याङमा बसले पार्किङ गरेर राखिएको माइक्रो भ्यानलाई ठक्कर दिँदा दुई जनाको मृत्यु भएको छ भने तीन जना घाइते भएका छन् ।
प्रहरीका अनुसार शनिबार बिहान करिब ८ः२५ बजे बा प्र ०८-१ ख ००५२ नम्बरको बस आफैं गुडेर सडक छेउमा रोकिराखिएको बा प्र ३-००१ ज ११७६ नम्बरको खाली ईभी भ्यानमा ठोक्किएको थियो ।
ठक्करपछि बस र ईभी भ्यान सडकबाट करिब ३०/४० मिटर तल भिरमा खसेका थिए । दुर्घटनामा घाइते भएका पाँचै जनालाई उपचारका लागि काठमाडौंस्थित ग्रिनसिटी अस्पताल ल्याइएको थियो ।
अस्पताल पुर्याउनेबित्तिकै दुई जनालाई चिकित्सकले मृत घोषणा गरेका थिए । मृत्यु हुनेमा काभ्रेपलाञ्चोकको बनेपा नगरपालिका–८ बस्ने ५४ वर्षीया कृष्णमाया प्रजापती डंगोल र रामेछापको ठाडादेवी गाउँपालिका-२ बस्ने ६५ वर्षीया उदयमाया खत्री रहेका छन् ।
दुर्घटनामा सर्लाहीको लालबन्दी नगरपालिका-९ घर भई हाल काठमाडौं काँडाघारी बस्ने २५ वर्षीया सुजता पोखरेल, काभ्रेपलाञ्चोकको बनेपा नगरपालिका–१० बस्ने ४२ वर्षीया शर्मिला श्रेष्ठ र दोलखाको मेलुङ गाउँपालिका–६ घर भई हाल काठमाडौं काँडाघारी बस्ने ६० वर्षीया ज्ञानु श्रेष्ठ घाइते भएका छन् । उनीहरूको ग्रिनसिटी अस्पतालमा उपचार भइरहेको छ ।
प्रहरीले बस चालकलाई नियन्त्रणमा लिएको जनाएको छ । घटनाबारे थप अनुसन्धान भइरहेको प्रहरीले जनाएको छ ।
