काठमाडौँ । नेपाली कांग्रेसका नेता डा. शशांक कोइरालाले पार्टीको आन्तरिक एकता र सुदृढीकरणका लागि सबै पक्ष एकताबद्ध हुनुपर्ने बताएका छन्।
आइतबार काठमाडौँमा संस्थापन इतर पक्षले आयोजना गरेको राष्ट्रिय भेलाको समापन गर्दै उनले पार्टीभित्र एकता कायम गरेर अघि बढ्नुपर्नेमा जोड दिएका हुन्।
भेलाले पारित गरेका पाँचबुँदे प्रस्तावप्रति ऐक्यबद्धता जनाउँदै कोइरालाले सहभागीलाई धन्यवाद तथा शुभकामना दिए। उनले आगामी दिनमा पनि यस्ता सांगठनिक गतिविधिलाई निरन्तरता दिने बताए।
‘यो सम्मेलन एकताका लागि आयोजना गरिएको हो। यही एकताका कारण आज हामी एकै ठाउँमा उभिएका छौँ र भोलिका दिनमा पनि एकताबद्ध भएर अघि बढ्नुपर्छ,’ उनले भने।
कोइरालाले सम्मेलन सफल हुनु आफ्नो कारणले नभई सहभागीको सहभागिता, सहमति र सहयोगका कारण सम्भव भएको बताए। भेलाले आफूलाई संयोजकको जिम्मेवारी दिएकोमा उनले आभार व्यक्त गरे।
उनले आवश्यकताअनुसार आगामी दिनमा यस्ता भेला केन्द्रमा मात्र सीमित नराखी स्थानीय तहसम्म पुगेर आयोजना गर्न सकिने बताए।
