इन्डियन प्रिमियर लिग (आईपीएल)२०२६ मा राजस्थान रोयल्सले मुम्बई इन्डियन्सलाई ३० रनले पराजित गर्दै प्लेअफमा आफ्नो स्थान सुरक्षित गरेको छ।
वानखेडे स्टेडियममा टस हारेर पहिले ब्याटिङ गरेको राजस्थानले निर्धारित २० ओभरमा ८ विकेट गुमाउँदै २०५ रनको बलियो योगफल खडा गरेको थियो। जवाफी ब्याटिङमा उत्रिएको मुम्बईको टोलीले २० ओभरमा ९ विकेट गुमाएर १७५ रन मात्र बनाउन सक्यो।
यस जितसँगै आईपीएल २०२६ को शीर्ष चार (टप-४) टोलीहरूको टुङ्गो लागेको छ। यस सिजन रोयल च्यालेन्जर्स बैंगलुरू, गुजरात टाइटन्स, सनराइजर्स हैदरावाद र राजस्थान रोयल्सले प्लेअफमा स्थान बनाएका छन्।
आगामी मे २६ मा हुने क्वालिफायर-१ मा बैंगलुरू र गुजरातबिच प्रतिस्पर्धा हुनेछ भने मे २७ मा हुने एलिमिनेटर खेलमा हैदरावाद र राजस्थान भिड्ने छन्।
२०६ रनको विशाल लक्ष्य पछ्याएको मुम्बईको सुरुवात अत्यन्तै खराब रह्यो। प्रारम्भिक ब्याटर रोहित शर्मा खाता नै नखोली आउट भए भने पावरप्लेभित्रै मुम्बईले आफ्नो ४ विकेट गुमाइसकेको थियो।
त्यसपछि सूर्यकुमार यादवले ६० रन र हार्दिक पाण्ड्याले ३४ रन बनाउँदै टोलीलाई खेलमा फर्काउने प्रयास गरे पनि लगातार रूपमा विकेट झरेका कारण मुम्बई लक्ष्यभन्दा टाढिन पुग्यो।
राजस्थानका तर्फबाट घातक बलिङ गर्दै जोफ्रा आर्चरले सर्वाधिक ३ विकेट लिए। त्यस्तै नांद्रे बर्गर, ब्रिजेश शर्मा र यश पुञ्जाले समान २-२ विकेट चट्काए।
त्यसअघि पहिले ब्याटिङ गरेको राजस्थानका लागि ध्रुव जुरेलले ३८ रन, जोफ्रा आर्चरले १५ बलमा ३२ रन र दासुन शनाकाले २९ रनको योगदान दिएका थिए।
खेलको अन्तिम समयमा रवीन्द्र जडेजा र नांद्रे बर्गरले तीव्र गतिमा रन जोड्दै टोलीको स्कोर २०० रनको पार पुर्याएका थिए।
मुम्बईका तर्फबाट बलिङ गर्दै दीपक चाहर र शार्दूल ठाकुरले २-२ विकेट लिए भने विल ज्याक्स, अल्लाह गजनफर र कर्बिन बशले १-१ सफलता हात पारे।
