काठमाडौं । १९औँ संस्करणको मिस नेवा: नेपालको उपाधि ललितपुरको पाटनकी तिशा शाक्यले जितेकी छन्।
नेप्लिज फेसन होमको आयोजनामा कमलादीस्थित नेपाल प्रज्ञा प्रतिष्ठानमा आइतबार सम्पन्न प्रतियोगितामा शाक्यले १६ प्रतिस्पर्धीलाई पछाडि पार्दै उपाधिका साथ नगद एक लाख रुपैयाँ प्राप्त गरिन् ।
उपाधि विजेता तिशाले मिस नेवा: नेपालको मुख्य ताजसँगै गोदावरी नगरपालिका बेस्ट नेपालभाषाको उपाधिसमेत जितेकी छन् । सो बापत उनलाई थप १० हजार रुपियाँ प्रदान गरिएको थियो ।
प्रतियोगितामा सारिका महर्जन फस्ट रनर्सअप तथा जेसिका श्रेष्ठ सेकेन्ड रनर्सअप घोषित भए । फस्ट र सेकेन्ड रनर्सअप भएबापत सारिकाले ५० हजार र जेसिकाले २५ हजार रुपैयाँ नगद पुरस्कार प्राप्त गरे ।
काठमाडौँ महानगरपालिकाकी कार्यवाहक प्रमुख तथा पूर्व मिस नेवा: नेपाल सुनिता डङ्गोलको प्रमुख आतिथ्यतामा सम्पन्न प्रतियोगितामा सबनम शाक्य मिस ट्यालेन्ट घोषित भइन् भने हिमानी प्रधान मिस ट्यालेन्ट फस्ट रनर्सअप र करुणा चक्रधर मिस ट्यालेन्ट सेकेन्ड रनर्सअप भए। करुणा चक्रधर र शिक्षा महर्जन सोसियल वेलफेयर एम्बेसडर चिफ घोषित भए। सोही विधामा सारिका महर्जन फस्ट रनर्सअप र दृष्टि महर्जन सेकेन्ड रनर्सअप बने।
प्रतियोगितामा दुर्गा देउलाले मिस डिसिप्लिन, हिमानी प्रधानले मिस पब्लिक च्वाइस र प्रिस्टिन अवालेले बेस्ट ड्रेसको उपाधि जिते। कञ्चनजंघा अगरबत्ती मिस कल्चरको उपाधि नगद १० हजार रुपियाँसहित शिक्षा महर्जनले जितिन् भने बेलाभिटा मिस पर्सनालिटी नगद १० हजार रुपियाँसहित निश्ला महर्जनले जितिन् ।
श्री केश बेस्ट हेयरको उपाधि नगद १० हजार रुपियाँसहित कलशा अवालेले, बेस्ट स्किन दृष्टि महर्जनले, तस्बिर मिस फोटोजेनिक सारिका महर्जनले, मिस स्माइल अनुष्का नाकर्मीले तथा मिस चार्मिङ सोनिया महर्जनले प्राप्त गरे। मिस फ्रेन्डसिपको उपाधि रेजिना बज्राचार्यले जितिन्।
नमुना कलेज अफ फेसन टेक्नोलोजीकी संस्थापक प्रिन्सिपल तथा फेसन डिजाइनर ज्ञानी शोभा तुलाधर प्रमुख निर्णायक रहेको प्रतियोगितामा अधिवक्ता लक्ष्मण महर्जन, नमुना कलेज अफ फेसन टेक्नोलोजीका भाइस प्रिन्सिपल जीवेश्वरलाल श्रेष्ठ, नेपाल लिपि गुठीका पूर्वअध्यक्ष अनिल स्थापित, सञ्चारकर्मी, लेक्चरर, उद्यमी तथा समाजसेवी रोहन श्रेष्ठ, नेपाल क्यान्सर हस्पिटल एन्ड रिसर्च सेन्टरकी सहसंस्थापक तथा निर्देशक स्वरूपा श्रेष्ठ र नेपाल क्यान्सर रिलिफ सोसाइटी काठमाडौँ शाखाकी सचिव प्रा. दिव्यलक्ष्मी बज्राचार्य निर्णायक रहेका थिए।
