सेयर बजारमा उत्साह छाएको छ। मङ्गलवार नेप्से परिसूचक २४ दशमलव ५७ अङ्कले बढेर २ हजार ६ सय ५१ दशमलव ६८ विन्दुमा पुगेको छ। सेन्सेटिभ इण्डेक्स ४ दशमलव ३३ अङ्क, फ्लोट इण्डेक्स १ दशमलव ७३ अङ्क र सेन्सेटिभ फ्लोट इण्डेक्स १ दशमलव ५७ अङ्कले बढेको छ।
नेप्सेसँगै कारोबार रकममा पनि सुधार आएको छ। अघिल्लो कारोबार दिन अर्थात् सोमबार ३ अर्ब ५५ करोड रुपैयाँ बराबरको सेयर खरिदबिक्री भएको बजारमा मङ्गलवार ३ सय ५२ स्टकको ७२ हजार २२ पटकको कारोबारमा ४ अर्ब ४० करोड ७ लाख ५२ हजार रुपैयाँ बराबरको ९५ लाख १९ हजार कित्ता सेयर खरिदबिक्री भएको छ।
कालंगा हाइड्रोको सेयरमा सकारात्मक सर्किट लेभलमा कारोबार भएको छ। सो कम्पनीको सेयरमूल्य ६७ रुपैयाँ ३० पैसा बढेर ५ सय १६ रुपैयाँ ४० पैसामा अन्तिम कारोबार भयो। आरबिबि फोकस ४० को इकाईमूल्य करिब १४ प्रतिशत र सानिगाड हाइड्रोको सेयरमूल्य साढे १० प्रतिशतले बढेको छ।
कारोबार रकमका आधारमा १० प्रतिशत केबिएल डिबेञ्चर २०९० शीर्ष स्थानमा रहेको छ। २० करोड ७५ लाख रुपैयाँ बराबरको सो डिबेञ्चर कारोबार भएको छ। त्यस्तै,करिब १८ करोड रुपैयाँको १० दशमलव ३५ प्रतिशत एग्रीकल्चर बैंक डिबेञ्चर २०८३ कारोबार भएको छ भने ग्लोबल आइएमई बैंकको कारोबार रकम साढे १६ करोड रुपैयाँ नाघेको छ।
मङ्गलवार बजारका १३ वटै उपसमूहको परिसूचक बढेर हरियाली छाएको छ। जसमध्ये व्यापार उपसमूहको परिसूचक सर्वाधिक १ दशमलव ८९ प्रतिशतले बढेको छ। त्यस्तै बैंकिङ्ग र विकास बैंक उपसमूहको परिसूचक पनि १ प्रतिशतभन्दा बढीले बढेको छ।
