ट्याक्टर दुर्घटना हुँदा कञ्चनपुरको बेदकोट नगरपालिका घर भएका ४४ वर्षीय चालक देवसिंह भण्डारीको मृत्यु भएको छ । बिहीबार दिउँसो बैतडीको पुर्चौडी नगरपालिका –१ रोतेशिला क्षेत्रमा पुरघाटबाट ढोल्यामोडर्फ जाँदै गरेको सुपप्र ०२–००१ त १६०० नम्बरको ट्याक्टर दुर्घटनामा परेको हो ।
जिल्ला प्रहरी कार्यालय बैतडीका प्रवक्ता प्रहरी निरीक्षक, भुवन तिम्सिनाका अनुसार, बिहीबार दिउँसोे ट्याक्टर दुर्घटना हुँदा चालक भण्डारीको घटनास्थलमै मृत्यु भएको छ । प्रहरीका अनुसार ट्याक्टर सडकबाट करिब २५ मिटर तल खसेको छ ।
ट्याक्टरमा चालक भण्डारी बाहेक अन्य कोही सवार नरहेको प्रहरीले बताएको छ । घटनास्थलको मुचुल्का उठाउनका साथै, मृतकको शव पोस्टमार्टमका लागि जिल्ला अस्पताल लैजाने तयारी गरिएको प्रहरीले जनाएको छ । दुर्घटनाको विषयमा थप अनुसन्धान भइरहेको प्रहरी निरीक्षक तिम्सिनाले बताउनुभयो ।
