२ साउन, काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले शनिबार र आइतबार देशका विभिन्न क्षेत्रमा अति भारी वर्षाको सम्भावना रहेकाले उच्च सतर्कता अपनाउन आग्रह गरेको छ।
प्राधिकरणका अनुसार कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थानमा अति भारी वर्षा हुन सक्ने पूर्वानुमान छ। वर्षासँगै २३ भन्दा बढी जिल्लामा बाढी, पहिरो, कटान, गेग्रान बहाव, सहरी तथा तराई क्षेत्रमा डुबानको जोखिम उच्च रहेकाले आवश्यक सावधानी अपनाउन अनुरोध गरिएको छ।
उच्च जोखिममा रहेका जिल्लामा पाँचथर, इलाम, झापा, संखुवासभा, तेह्रथुम, भोजपुर, खोटाङ, धनकुटा, सिन्धुली, ललितपुर, काभ्रे, सिन्धुपाल्चोक, नुवाकोट, चितवन, धादिङ, गोरखा, लमजुङ, कास्की, तनहुँ, पर्वत, बाग्लुङ, म्याग्दी र स्याङ्जा रहेका छन्।
प्राधिकरणले विशेष गरी रातिको समयमा अनावश्यक सवारी आवागमन नगर्न आग्रह गर्दै आवश्यक परे परिस्थिति अनुसार जुनसुकै बेला सडक यातायातसमेत रोक्न सकिने जनाएको छ।
जल तथा मौसम विज्ञान विभागले पनि हिमाली तथा पहाडी भू–भागका साथै कोशी, बागमती, लुम्बिनी र सुदूरपश्चिम प्रदेशका तराई क्षेत्रमा भारीदेखि धेरै भारी वर्षाको सम्भावना रहेको जनाएको छ। मौसम पूर्वानुमान महाशाखाले विशेष बुलेटिन जारी गर्दै आगामी दुई दिन उच्च सतर्कता अपनाउन सबैमा आग्रह गरेको छ।
