नेपाल शिक्षक महासंघले शिक्षा ऐन जारी गर्नुपर्ने लगायतका माग राख्दै आगामी भदौदेखि आन्दोलनमा उत्रिने निर्णय गरेको छ।
महासंघको परिषद् बैठकले भदौदेखि आन्दोलन सुरु गर्ने निर्णय गरेको महासचिव तुलाबहादुर थापाले जानकारी दिए। उनका अनुसार आन्दोलनको ठोस मिति र कार्यक्रम भने विस्तारित कार्यालय बैठकले तय गर्नेछ।
महासंघले शिक्षा ऐन तत्काल जारी गर्नुपर्ने माग गर्दै आएको छ। त्यस्तै, शिक्षा नियमावलीको १०औँ संशोधनमा समेटिएका केही प्रावधानप्रति पनि महासंघले असन्तुष्टि जनाएको छ। ‘भदौबाट आन्दोलन गर्ने निर्णय भएको छ। आन्दोलनको तिथि मिति विस्तारित कार्यालय बैठकले निर्णय गर्छ,’ थापाले भने।
शिक्षक सरुवालाई व्यवस्थित बनाउनुपर्ने, विद्यालय कर्मचारी तथा ईसीडी शिक्षकको समस्या समाधान गर्नुपर्ने र अस्थायी प्रकृतिका शिक्षकको उचित व्यवस्थापन गर्नुपर्ने माग पनि महासंघले अघि सारेको छ। महासंघले आफ्ना माग सम्बोधनका लागि सरकारमाथि दबाब बढाउने तयारीस्वरूप आन्दोलनको निर्णय गरेको जनाएको छ।
