जिल्ला प्रहरी कार्यालय धनुषाले अदालतबाट कैद तथा जरिवाना सजाय तोकिएपछि फरार रहेका ११ जना प्रतिवादीलाई पक्राउ गरेको छ।
जिल्ला प्रहरी कार्यालय धनुषाले सोमबार जारी गरेको प्रेस विज्ञप्तिअनुसार नेपाल सरकार गृह मन्त्रालयअन्तर्गतको फैसला कार्यान्वयन अभियानका क्रममा जिल्ला प्रहरी कार्यालय तथा मातहतका प्रहरी टोलीले खोजतलास गरी फरार प्रतिवादीहरूलाई पक्राउ गरेको हो।
प्रहरीका अनुसार पक्राउ परेकामध्ये सवारी ज्यानका छ जना, लागु औषधमा चार जना, कुटपिट र लुटपिटको एक गरी ११ जना पक्राउ परेका छन् भने एक जनालाई २ वर्ष कैद र २० हजार रुपियाँ जरिवाना, केहीलाई ६ महिना कैद तथा २ हजार रुपियाँ जरिवाना, तथा अन्यलाई २० देखि २८ दिनसम्म कैद सजाय तोकिएको थियो।
पक्राउ परेका सबै प्रतिवादीलाई आवश्यक कानुनी कारबाहीका लागि सम्मानित धनुषा जिल्ला अदालतमा पेश गरिएको जिल्ला प्रहरी कार्यालय धनुषाले जनाएको छ। प्रहरीले अदालतको फैसला कार्यान्वयनलाई प्रभावकारी बनाउन फरार प्रतिवादीहरूको खोजी तथा पक्राउ अभियानलाई निरन्तरता दिने जनाएको छ।
