पर्साको वीरगञ्ज महानगरपालिका–२४ बहुअरी चोकस्थित हुलाकी सडकखण्डमा ग्यास ट्याङ्करले ई–रिक्सालाई पछाडिबाट ठक्कर दिँदा ई–रिक्सामा सवार ९ जना घाइते भएका छन् ।
बुधबार राति करिब ८ बजे पावरहाउसबाट तिलावे पुलतर्फ जाँदै गरेको ना २ ह ६६८२ नम्बरको ई–रिक्सालाई सोही दिशाबाट आइरहेको आरजे १४ जिई ८७१० नम्बरको ग्यास ट्याङ्करले पछाडिबाट ठक्कर दिएको प्रहरीले जनाएको छ ।
दुर्घटनामा घाइते भएका ९ जनामध्ये ६ जनाको अवस्था गम्भीर र ३ जनाको अवस्था मध्यम रहेको छ । सबै घाइतेको उद्धार गरी वीरगञ्जस्थित नारायणी न्युरो अस्पतालमा उपचार भइरहेको प्रहरीले जनाएको छ ।
प्रहरीले फरार भएका ग्यास ट्याङ्कर र चालकलाई नियन्त्रणमा लिएको छ । पक्राउ पर्ने चालक भारतको मुजफ्फरपुर जिल्लाको साहेबगञ्ज निवासी करिब ४८ वर्षीय धनेश्वर राय रहेको प्रहरीले जनाएको छ ।
स्वास्थ्य परीक्षणका क्रममा चालकले मादक पदार्थ सेवन गरेको समेत पुष्टि भएको र दुर्घटनाबारे थप अनुसन्धान भइरहेको प्रहरीले जनाएको छ ।
