लमजुङको बेसीशहर नगरपालिका–३ दनाई गाउँमा शनिबार जीप दुर्घटना हुँदा सात जना घाइते भएका छन्।
रानीकुवाबाट गाउँशहरतर्फ जाँदै गरेको गण्डकी प्रदेश ०१–००१ ज ००५१ नम्बरको जीप दिउँसो करिब २ः५० बजे अनियन्त्रित भई सडक छेउमा पल्टिएको जिल्ला प्रहरी कार्यालय लमजुङले जनाएको छ। जीपमा चालकसहित आठ जना सवार थिए।
दुर्घटनामा बेसीशहर नगरपालिका-३ दनाई गाउँका ४० वर्षीया मैया दुलाल, ६१ वर्षीया राधिका घर्ती, ५० वर्षीया मैया मालुवा, ४० वर्षीय काजीराम हिमाली, ५७ वर्षीय सन्तबहादुर सार्की, ७० वर्षीया सन्तमाया नेपाली र ४५ वर्षीया रिता मगर घाइते हुनुभएको छ ।
घाइतेमध्ये हिमालीको अवस्था मध्यम रहेको प्रहरी निरीक्षक ज्ञानेन्द्र क्षेत्रीले जानकारी दिनुभयो । अन्यको अवस्था सामान्य छ। उनीहरूलाई प्रहरी टोलीले उद्धार गरी उपचारका लागि प्रदेश अस्पताल लमजुङ पठाएको थियो।
दुर्घटनालगत्तै प्रहरी नायब निरीक्षक भरत थापाको नेतृत्वमा जिल्ला प्रहरी कार्यालयबाट १५ जनाको टोली घटनास्थल पुगेको थियो। जीप चालक बेसीसहर–३ का ४० वर्षीय निर्मल देउजालाई चोटपटक लागेको छैन। उनलाई प्रहरीले नियन्त्रणमा लिएको जनाएको छ।
घटनास्थल जिल्ला प्रहरी कार्यालय लमजुङबाट करिब तीन किलोमिटर पश्चिममा पर्छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
