९ भदौ, काठमाडौं । रसुवाको भोटेकोसी नदीमा तिब्बततर्फबाट आएको भीषण बाढीले स्याफ्रुबेसीलगायतका बजार र जलविद्युत् आयोजनामा ठूलो क्षति पुर्याएको छ।
बिहान ९ः१५ बजे तिब्बततर्फबाट ठूलो बाढी प्रवेश गरेपछि बाढी पूर्वानुमान महाशाखाले अर्को सूचना नआएसम्म त्रिशूली नदीको तटीय क्षेत्र हुँदै मुग्लिनसम्म उच्च सतर्कता अपनाउन आग्रह गरेको छ।
स्थानीयका अनुसार बाढीले एउटा जलविद्युत् आयोजना बगाएको छ भने चिलिमेलगायत अन्य आयोजनामा समेत क्षति पुगेको छ। बाढीको स्वरूप हेर्दा कुनै ड्याम फुटेर आएको हुनसक्ने स्थानीयको अनुमान छ।
बाढीको प्रभाव नुवाकोट र धादिङसम्म पर्न सक्ने भन्दै प्रशासनले त्रिशूली आसपासका बस्तीलाई सतर्क रहन आग्रह गरेको छ। सम्भावित जोखिमलाई मध्यनजर गर्दै धादिङमा सुरक्षाकर्मी परिचालन गरिएको प्रमुख जिल्ला अधिकारी लक्ष्मीप्रसाद पाण्डे गौतमले जानकारी दिए।
बाढी कहाँबाट र कसरी आएको हो भन्नेबारे भने अहिलेसम्म यकिन विवरण सार्वजनिक भएको छैन।
