२७ भदौ, काठमाडौं । नेपालले एसीसी प्रिमियर कपको उपाधि जित्दै एसिया कपमा आफ्नो स्थान पक्का गरेको छ। मलेसियाको क्वालालम्पुरमा शनिबार भएको फाइनलमा नेपालले यूएईलाई ४४ रनले पराजित गर्दै उपाधि जितेको हो।
एसीसी प्रिमियर कपको विजेता टोली एसिया कपका लागि छनोट हुने व्यवस्था रहेकाले उपाधिसँगै नेपालले एसिया कपको टिकट पक्का गरेको हो।
नेपालले दिएको ३१४ रनको लक्ष्य पछ्याएको यूएई २६९ रनमै अलआउट भयो। यूएईका लागि राहुल चोप्राले शतक बनाए। शोयब खानले ५२, तानिस सुरीले ४२, हरप्रित सिंहले ३३ र खुजैमा तनवीरले १५ रन बनाए। अन्य खेलाडीले दोहोरो अंकमा रन बनाउन सकेनन्।
नेपालका लागि करण केसीले तीन विकेट लिए। ललित राजवंशीले दुई तथा सन्दीप लामिछाने, दीपेन्द्रसिंह ऐरी, रोहित पौडेल र गुल्सन झाले समान एक–एक विकेट लिए।
यसअघि टस जितेर पहिले ब्याटिङ गरेको नेपालले आशिफ शेखको शतकको मद्दतमा नौ विकेट गुमाएर ३१३ रन बनाएको थियो। आशिफले १०६ बलमा आठ चौका र चार छक्कासहित १०४ रन बनाए।
नेपालका लागि गुल्सन झाले ५२, अर्जुन कुमालले ४३ र रोहित पौडेलले ४० रन बनाए। यस्तै, दीपेन्द्रसिंह ऐरीले १८, बसिर अह्मदले १५, इशान पाण्डेले १३, सन्दीप जोराले सात तथा करण केसी र ललित राजवंशीले समान एक–एक रन जोडे।
यूएईका लागि इब्रार अह्मदले चार विकेट लिए। खुजैमा तनवीरले दुई तथा हैदर अली र अदीब उस्मानीले समान एक–एक विकेट लिए।
नेपालले फाइनलमा ब्याटिङ र बलिङ दुवैतर्फ प्रभावशाली प्रदर्शन गर्दै उपाधि आफ्नो नाममा गरेको हो।
