८ असोज, काठमाडौं । नेकपा (एमाले) को केन्द्रीय सचिवालय बैठकमा केन्द्रीय समिति र स्थायी समितिमा मनोनयन गर्ने विषयमा छलफल भएको छ ।
पार्टी मुख्यालय च्यासलमा बसेको बैठकपछि जानकारी दिँदै एमाले उपमहासचिव लेखराज भट्टले केन्द्रीय समितिमा कसलाई र कसरी मनोनयन गर्ने भन्ने विषयमा विस्तृत छलफल भएको बताए ।
उनका अनुसार स्थायी समितिमा थप गर्नुपर्ने सदस्यहरुका विषयमा समेत बैठकमा छलफल भएको छ । यी विषयमा अन्तिम निर्णय भने केन्द्रीय समितिको बैठकबाट हुने उनले जानकारी दिए ।
उनले भने, ‘ मनोनयन कसलाई कसरी गर्ने भन्ने विषयमा छलफल भयो । त्यसले अलि लामो समय लियो । त्यसैगरी स्थायी समितिका सन्दर्भमा पनि छलफल भयो । यि सबै विषय केन्द्रीय कमिटीमा नै गएर टुङ्गिन्छन् ।’
बैठकमा पार्टी अध्यक्षको अघिल्लो दिन प्रस्तुत प्रतिवेदनका विषयमा समेत छलफल भएको भट्टले बताए । अध्यक्षको प्रतिवेदनले पार्टीभित्र एकताको भावना पैदा गरेको उल्लेख गर्दै उनले त्यसलाई तल्लो तहसम्म एकरूपताका साथ सम्प्रेषण गर्ने विषयमा बैठकले विशेष जोड दिएको बताए ।
त्यस्तै, विभिन्न समूहबाट एकतामा आएका तथा पार्टी प्रवेश गरेका नेताहरूलाई केन्द्रीय समितिमा मनोनयन गर्ने विषयमा पनि छलफल भएको उनले जानकारी दिए । मनोनयनसम्बन्धी अन्तिम निर्णय केन्द्रीय समितिको बैठकबाट भएपछि नाम सार्वजनिक गरिने उनको भनाइ छ ।
स्थायी समितिमा मनोनयनका लागि केही विषय टुंगिएको भएपनि त्यसको औपचारिक निर्णय केन्द्रीय समितिबाट हुने भट्टले बताए ।
बैठकले बाँकी विषयमा केन्द्रीय समितिमा छलफल गरी आवश्यक निर्णय गर्ने र सचिवालयले त्यसका लागि अग्राधिकार लिएर काम गर्ने निर्णय गरेको उनले जानकारी दिए ।
