८ असोज, काठमाडौं । चितवन प्रशासनले नारायणगढ-मुग्लिन सडकखण्डमा बिहीबार राती ८ बजेदेखि भोली बिहान ५ बजेसम्म सवारी आवागमन पूर्ण रूपमा बन्द गरिने निर्णय गरेको छ ।
जिल्ला प्रशासन कार्यालय चितवनले निरन्तर वर्षा तथा बाढी-पहिरोको उच्च जोखिमलाई मध्यनजर गर्दै रातिको समयमा सम्पूर्ण सवारी आवागमन बन्द गर्ने निर्णय गरेको हो । यो सडकखण्डमा चल्ने सम्पूर्ण सवारीसाधनको आवागमन रोक लगाइएको छ ।
सहायक प्रमुख जिल्ला अधिकारी ईश्वरीप्रसाद शर्माद्वारा जारी सूचनामा अत्यावश्यकबाहेक यात्रा नगर्न, मौसम तथा सडकको अवस्थाबारे जानकारी लिएर मात्र यात्रा गर्न र जोखिमयुक्त स्थानमा विशेष सतर्कता अपनाउन सर्वसाधारणलाई आग्रह गरिएको छ ।
नारायणगढ-मुग्लिन सडकखण्डमा वर्षायाममा पहिरो तथा बाढीका कारण पटक–पटक यातायात प्रभावित हुँदै आएको छ ।
