१३ असोज, काठमाडौं । प्रेस काउन्सिल नेपालका अध्यक्षलाई कार्यकक्षमै ‘झ्यालबाट टिपेर फालिदिन्छु’ भन्दै धम्कीपूर्ण अभिव्यक्ति दिइएको घटनाप्रति काउन्सिलले गम्भीर ध्यानाकर्षण भएको जनाएको छ ।
मंगलबार बिहान नेपाल पत्रकार महासङ्घको नेतृत्वसँग लोककल्याणकारी विज्ञापन सम्बन्धी छलफलका क्रममा पत्रकार दीपक पाण्डेले काउन्सिल अध्यक्षलाई उक्त धम्कीपूर्ण अभिव्यक्ति दिएको विज्ञप्तिमा उल्लेख छ ।
छापामाध्यम बचाउ सुझाव कार्यदलका मागका सम्बन्धमा काउन्सिल अध्यक्षको कार्यकक्षमा छलफल जारी रहँदा अन्य सहभागीबाट समेत काउन्सिलका कर्मचारीलाई अपमानजनक व्यवहार भएको भन्दै काउन्सिलले भत्र्सना गरेको छ । छलफल र असहमति हुनु स्वाभाविक भए पनि त्यस क्रममा धम्कीपूर्ण भाषा स्वीकार्य हुन नसक्ने काउन्सिलको ठहर छ । काउन्सिलले आफ्ना पेसागत माग राख्ने अधिकारको सम्मान गर्ने भए पनि संस्थागत संवादका क्रममा मर्यादित र जिम्मेवार व्यवहारको अपेक्षा गरिएको बताएको छ ।
उक्त विज्ञप्तिमा प्रेस काउन्सिल नेपालका सदस्यहरू नम्रता शर्मा, रविराज बराल, उपासना घिमिरे र प्रकाशभक्त माथेमाले संयुक्त रूपमा हस्ताक्षर गरेका छन् ।
