शिक्षा तथा खेलकुद मन्त्री सस्मित पोखरेलले सरकारले कुनै पनि विद्यार्थीलाई शिक्षाको अधिकारबाट वञ्चित हुन नदिने बताएका छन्।
प्रतिनिधिसभा बैठकमा आगामी आर्थिक वर्षको बजेटमाथि उठेका प्रश्नहरूको जवाफ दिँदै मन्त्री पोखरेलले यस्तो बताएका हुन्।
संसदमा न्यून विद्यार्थी संख्या भएका विद्यालयहरू गाभ्न सुझाव आएको उल्लेख गर्दै उनले विद्यार्थी संख्या कम भएकै आधारमा विद्यालय गाभ्ने निर्णय नगरिने स्पष्ट पारे। विद्यालय व्यवस्थापनका विषयमा निर्णय गर्दा विद्यार्थीहरूको शैक्षिक अधिकार र शिक्षामा पहुँचलाई प्राथमिकता दिइने उनको भनाइ थियो।
संविधानले प्रत्येक नागरिकलाई शिक्षा प्राप्त गर्ने मौलिक हक सुनिश्चित गरेको उल्लेख गर्दै मन्त्री पोखरेलले सरकारले सबै बालबालिकाको शिक्षामा पहुँच विस्तार, गुणस्तरीय शिक्षा प्रदान तथा समावेशी शैक्षिक वातावरण निर्माणलाई उच्च प्राथमिकतामा राखेको बताए।
उनले आर्थिक, सामाजिक वा भौगोलिक कारणले कुनै पनि बालबालिका शिक्षाबाट वञ्चित हुन नपरोस् भन्ने उद्देश्यका साथ सरकार प्रतिबद्ध रहेको समेत बताए।
