३१ असार, काठमाडौं । मंगलबार बसेको मन्त्रिपरिषदको बैठकले ६ जना सचिवको सरूवा गरेको छ । तीन महिनाअघि उद्योग, वाणिज्य तथा आपूर्ति मन्त्रालय पठाइएका सचिव कृष्णबहादुर राउतलाई महिला, बालबालिका, ज्येष्ठ नागरिक तथा समाज कल्याण मन्त्रालयमा सरुवा गरिएको छ ।

सो मन्त्रालयकी सचिव राधिका अर्याललाई प्रधानमन्त्री तथा मन्त्रिपरिषद्को कार्यालय लगेर अतिरिक्तमा राखिएको छ । सचिव राउतको तीन महिना अघि निर्वाचन आयोगबाट उद्योग मन्त्रालयमा सरूवा भएका थियो ।

उद्योग, वाणिज्य तथा आपूर्ति मन्त्रालयको सचिवमा अख्तियार दुरूपयोग अनुसन्धान आयोगका सचिव नारायणप्रसाद शर्मा दुवाडीलाई लगिएको छ । स्वास्थ्य तथा जनसंख्या मन्त्रालयका सचिव डिल्लीराम शर्मालाई अख्तियार दुरूपयोग अनुसन्धान आयोगमा पठाइएको छ ।

राष्ट्रिय सतर्कता केन्द्रका सचिव दीनानाथ मिश्रलाई नवगठित विज्ञान, प्रविधि तथा नवप्रवर्तन मन्त्रालयमा लगिएको छ । राष्ट्रिय सतर्कता केन्द्रको सचिवमा पूर्वाधार विकास मन्त्रालयका सचिव विश्वबाबु पुडासैनीलाई सरूवा गरिएको छ ।