१८ असोज, वीरगञ्ज । जनमत पार्टीको नयाँ केन्द्रीय कार्यसमिति चयन गर्दैछ । पर्साको वीरगञ्जमा शनिबारदेखि सुरु भएको पार्टीको महाधिवेशनअन्तर्गत नयाँ नेतृत्व चयनका लागि मतदान हुनेछ ।
२६ पदाधिकारीसहित ९९ जना उम्मेदवारका लागि मतदान भएको थियो । पार्टी पर्साका अध्यक्ष तथा महाधिवेशन व्यवस्थापन समितिका संयोजक ओमप्रकाश सर्राफका अनुसार शनिबार राति ९ बजेदेखि मतगणना सुरु भएको थियो ।
अध्यक्ष पदमा डा. सिके राउतको मात्र उम्मेदवारी परेको छ । उनी निर्विरोध निर्वाचित हुने निश्चित छ । पार्टीको विधानअनुसार उम्मेदवारले कुल सदर मतको कम्तीमा २० प्रतिशत मत ल्याउनुपर्ने प्रावधान भएकाले राउतको पक्षमा पनि मतदान भएको छ ।
७ उपाध्यक्ष पदका लागि ११ जना, महासचिवमा तीन जना, उपमहासचिवमा दुई जना र सात सचिव पदका लागि नौ जनाबीच प्रतिस्पर्धा भएको छ । कार्यकारिणी सदस्यका लागि ७३ जनाले उम्मेदवारी दिएका छन् । महाधिवेशनमा कुल १ हजार १५५ प्रतिनिधिले मतदानमा भाग लिएका थिए ।
