पूर्व उपप्रधान तथा अर्थमन्त्री तथा नेकपा एमालेका उपाध्यक्ष विष्णु पौडेललाई थप तीन दिन हिरासतमा राखिने भएको छ ।

विशेष अदालतले सम्पत्ति शुद्धीकरण कसुरमा पक्राउ परेका पौडेललाई थप तीन दिन हिरासतमा राखेर अनुसन्धान गर्न अनुमति दिएको हो।

न्यायाधीश नारायणप्रसाद पौडेल, हेमन्त रावल र उमेश कोइरालाको इजलासले अनुसन्धान अपूरो रहेको भन्दै थप तीन दिन म्याद थप गर्न अनुमति दिएको हो ।

पौडेललाई सम्पत्ति शुद्धीकरणसम्बन्धी कसुरमा असार ८ गते सुर्खेतबाट पक्राउ गरिएको थियो। त्यसअघि विशेष अदालतले असार ८ गतेदेखि लागू हुने गरी सात दिन हिरासतमा राखेर अनुसन्धान गर्न अनुमति दिएको थियो।

यसअघि प्राप्त सात दिनको म्याद असार १४ गते सकिएपछि अनुसन्धान जारी राख्न आवश्यक रहेको भन्दै अनुसन्धान निकायले पुनः म्याद थपको माग गरेको थियो। अदालतले उक्त माग स्वीकृत गर्दै पौडेललाई थप तीन दिन हिरासतमा राख्न अनुमति दिएको हो ।

सम्पत्ति शुद्धीकरणसम्बन्धी कसुरमा पौडेलमाथिको अनुसन्धान जारी रहेको सम्बन्धित निकायले जनाएको छ ।