लगातारको वर्षापछि बागमती नदीमा पानीको सतह बढ्दा कीर्तिपुर नगरपालिका–१० सुन्दरीघाटस्थित राधास्वामी सुकुमवासी होल्डिङ सेन्टर डुबानमा परेको छ।
शुक्रबार रातिदेखि परेको अविरल वर्षाका कारण बागमती नदीमा पानीको बहाव तीव्र बनेपछि नदी किनारमा रहेको होल्डिङ सेन्टर जलमग्न भएको हो। शनिबार बिहानसम्म पनि सेन्टरको अधिकांश भाग डुबानमै रहेको स्थानीयले बताएका छन्।
डुबानका कारण होल्डिङ सेन्टरमा बसोबास गरिरहेका परिवारहरू प्रभावित भएका छन्। उनीहरूको दैनिक जीवन प्रभावित हुनुका साथै खाद्यान्न, लत्ताकपडा र अन्य अत्यावश्यक सामग्रीमा समेत क्षति पुगेको प्रारम्भिक अनुमान गरिएको छ।
स्थानीय प्रशासन, सुरक्षाकर्मी तथा सम्बन्धित निकायले डुबानग्रस्त क्षेत्रको अवस्था अनुगमन गरिरहेका छन्। आवश्यक परे प्रभावितलाई सुरक्षित स्थानमा सार्ने तयारीसमेत गरिएको जनाइएको छ।
लगातार वर्षा भइरहेकाले नदी आसपासका बासिन्दालाई सतर्क रहन तथा आवश्यक सावधानी अपनाउन सम्बन्धित निकायले आग्रह गरेका छन्।
