२७ असार, बझाङ । बझाङको केदारस्यूँ गाउँपालिका–७ र दुर्गाथली गाउँपालिका–६ को सिमानास्थित सुंगरे क्षेत्रमा एउटा बोलेरो जीप दुर्घटना हुँदा तीनजनाको मृत्यु भएको छ । केदारस्यूँ–७ बाट दुर्गाथली–६, च्वाबनतर्फ जाँदै गरेको से १ च २४४४ नम्बरको जीप शनिबार अपराह्न दुर्घटना भएको प्रहरीले जनाएको छ ।
दुर्घटनामा परी तीनजनाको मृत्यु पुष्टि भएको छ । आठजना गम्भीर घाइते छन् । चार यात्री सामान्य घाइते भएका प्रहरीले जनाएको छ ।
चालक देवबहादुर धामीले चलाएको उक्त जिप सडकबाट खसेको प्रारम्भिक जानकारी प्राप्त भएको प्रहरीले जनाएको छ । दुर्गाथली–६ का वडाध्यक्ष जयबहादुर महतका अनुसार दुर्घटनामा मृत्यु हुनेमा दुर्गाथली–६ का चक्रबहादुर महत, कुटुरीदेवी महत तथा केदारस्युँ–७ की बिमला महत धामी रहेका छन् ।
दुर्घटनामा घाइतेमध्ये ८ जना सख्त घाइते छन् । जसमा दुई शिक्षक र एक पूर्ववडा सदस्य समेत छन् । सख्त घाइतेहरुमा जिप चालक देवबहादुर धामी, झल्कादेवी महत, जयमतीदेवी महत, हासुलीदेवी महत, शिक्षक रामबहादुर महत, हर्कादेवी महत, शिक्षक देवबहादुर जाग्री र पूर्ववडा सदस्य रामबहादुर महत रहेका छन् ।
