सिरहाको गोलबजार नगरपालिकामा केही दिनदेखि लागू रहेको कर्फ्यू आदेश हटाइएको छ। जिल्ला प्रशासन कार्यालयले सुरक्षा अवस्था सामान्य बन्दै गएको निष्कर्ष निकाल्दै आइतबार साँझ ७ बजेदेखि आदेश निष्क्रिय बनाएको हो।
प्रमुख जिल्ला अधिकारी सुरेन्द्र पौडेलले जारी गरेको सूचनामा पछिल्लो समय जिल्लाको शान्ति–सुरक्षाको अवस्था सन्तोषजनक देखिएकाले कर्फ्यू कायम राख्नुपर्ने आवश्यकता नरहेको उल्लेख गरिएको छ।
यसअघि प्रशासनले आइतबार बिहान १० बजेदेखि साँझ ७ बजेसम्मका लागि कर्फ्यूमा आंशिक छुट दिएको थियो। सो अवधिमा सवारीसाधन सञ्चालन गर्न अनुमति दिइएको भए पनि पाँच जनाभन्दा बढी व्यक्ति एकै ठाउँमा जम्मा नहुन आग्रह गरिएको थियो।
दिनभरको अवस्थाको थप मूल्याङ्कनपछि प्रशासनले कर्फ्यू पूर्णरूपमा अन्त्य गर्ने निर्णय गरेको जनाएको छ। अब गोलबजार क्षेत्रमा नागरिकले नियमितरूपमा आवतजावत तथा दैनिक गतिविधि सञ्चालन गर्न सक्ने छन्।
प्रशासनले सबै पक्षलाई संयम अपनाउँदै शान्ति, सुरक्षा र सामाजिक सद्भाव कायम राख्न सहयोग गर्न अनुरोध गरेको छ।
