११ भदौ, सुर्खेत । रसुवाको उत्तरी क्षेत्रमा बुधबार बिहान भोटेकोशी नदीमा आएको बाढीपछि रोजगारी तथा कामको सिलसिलामा रसुवा पुगेका हुम्लाका १० जना सम्पर्कविहीन भएका छन् ।
सम्पर्कविहीन हुनेमा आठ पुरुष र दुई महिला रहेको जिल्ला प्रशासन कार्यालय हुम्लाले जनाएको छ ।
जिल्ला प्रशासन कार्यालय हुम्लाका सहायक प्रमुख जिल्ला अधिकारी चन्द्रवीर शाहीका अनुसार हुम्लाका विभिन्न गाउँका बासिन्दा रोजगारी तथा कामको सिलसिलामा रसुवा पुगेका थिए। बाढी आएपछि उनीहरूसँग सम्पर्क हुन नसकेको उनले बताए ।
खार्पुनाथ गाउँपालिका–१ स्थायी घर भएका ३० वर्षीय जनक बुढा, अनिता रावत, उमेश बोहोरा तथा उमेश बोहोराकी श्रीमती र छोरा सम्पर्कविहीन छन् । उमेश बोहोराकी श्रीमती र छोराको नाम भने खुल्न सकेको छैन ।
त्यसैगरी, ताँजाकोट गाउँपालिका–२ का ४१ वर्षीय नहकुल शर्मा र धनराज जैसी पनि सम्पर्कविहीन छन् । शर्मा भन्सार अधिकृतका रूपमा कार्यरत रहेको प्रशासनले जनाएको छ ।
सर्केगाड गाउँपालिका–८ राहदेउका तुलाराज बुढा र मानबहादुर ऐडी तथा चङ्खेली गाउँपालिका–१ का मनजित बुढा पनि बाढीपछि सम्पर्कविहीन रहेको विवरण प्रशासनले सार्वजनिक गरेको छ ।
सहायक प्रमुख जिल्ला अधिकारी शाहीका अनुसार मनजित बुढाले बाढी आएको करिब ३० मिनेटपछि सामाजिक सञ्जाल फेसबुकमार्फत आफूहरू सुरक्षित रहेको आशयको पोस्ट गरेका थिए । त्यसपछि भने उनीसँग सम्पर्क हुन नसकेको उनले बताए ।
यसैबीच, कर्णाली प्रदेशका मुख्यमन्त्री मङ्गलबहादुर शाहीले रसुवा बाढीमा सम्पर्कविहीन भएका नागरिकको तत्काल खोज तथा उद्धारका लागि सम्बन्धित निकायसँग प्रभावकारी समन्वय गरी आवश्यक पहल भइरहेको बताएका छन् ।
मुख्यमन्त्री शाहीले विपद्का समयमा प्रभावित नागरिकको जीवनरक्षालाई पहिलो प्राथमिकतामा राख्दै खोज तथा उद्धारलाई तीव्र बनाउन सङ्घ, प्रदेश र स्थानीय सरकार तथा विपद् व्यवस्थापनसँग सम्बन्धित निकायलाई आग्रह गरेका छन् ।
