१२ भदौ, काठमाडौं । रसुवाको भोटेकोशी क्षेत्रमा आएको बाढीका कारण २७ जना प्रहरी कर्मचारी अझै सम्पर्कविहीन रहेका छन् । नेपाल प्रहरीका अनुसार सम्पर्कविहीनमध्ये एक जना प्रहरी कर्मचारी मृत अवस्थामा फेला परेका छन् ।
नेपाल प्रहरीले शुक्रबार साँझ ५ बजेसम्म सार्वजनिक गरेको विवरणअनुसार विभिन्न जिल्लामा हालसम्म ५५३ वटा शव फेला परेका छन् । फेला परेका शवमध्ये रसुवामा १३, नुवाकोटमा ३८, चितवनमा २२२, तनहुँमा ३१, धादिङमा ४०, गोरखामा ४७, नवलपरासी पूर्वमा १३४ र पश्चिम क्षेत्रमा २८ वटा रहेका छन् ।
बाढी तथा त्यसबाट प्रभावित क्षेत्रमा उद्धार तथा सुरक्षा व्यवस्थापनका लागि ४ हजार ४८९ जना प्रहरी परिचालन गरिएको छ ।
बाढीबाट घाइते तथा उद्धार गरिएका व्यक्तिको संख्या १४ सय ७३ जना रहेको छ ।
जसमा रसुवामा ५७२ र नुवाकोटमा ८९८ रहेको छ । धादिङमा तीन जना घाइते तथा उद्धार गरिएको विवरणमा उल्लेख छ ।
यसैगरी, काठमाडौं उपत्यकाका विभिन्न अस्पतालमा उपचाररत तथा उपचारपछि डिस्चार्ज भएका घाइतेको संख्या ९७ जना रहेको नेपाल प्रहरीले जनाएको छ ।
बाढीपछि बेपत्ता तथा प्रभावितको खोजी, उद्धार र राहत कार्यलाई प्रहरीले निरन्तरता दिइरहेको जनाएको छ ।
