नेपालका लागि भारतका राजदूत नवीन श्रीवास्तवले सभामुख डोलप्रसाद अर्यालसँग शिष्टाचार भेट गर्दै भारत भ्रमणको निम्तो दिएका छन् ।
भेटका क्रममा सभामुख अर्यालले नेपाल–भारत सम्बन्ध साझा इतिहास, संस्कृति र भौगोलिक निकटतामा आधारित रहेको उल्लेख गर्दै भारतका लोकसभा सभामुख ओम बिरलालाई नेपाल भ्रमणको निम्तो दिएका छन् ।
उनले व्यापार, कनेक्टिभिटी, ऊर्जा, नागरिक उड्डयन र संसदीय कूटनीतिमार्फत दुई देशबीचको सहकार्य अझ सुदृढ हुने विश्वास व्यक्त गरे ।
राजदूत श्रीवास्तवले लोकसभा सभामुख ओम बिरला नेपाल भ्रमणका लागि इच्छुक रहेको जानकारी गराउँदै सभामुख अर्याल तथा नेपाली सांसदहरूलाई भारतको संसदीय अभ्यास अध्ययनका लागि भारत भ्रमणको निम्तो दिएका थिए ।
उनले उच्चस्तरीय राजनीतिक संवाद र संसदीय कूटनीतिले नेपाल–भारत सम्बन्धलाई थप उचाइमा पुर्याउने विश्वास व्यक्त गरे ।
