२६ भदौ, जनकपुर। नेपाली कम्युनिष्ट पार्टी (नेकपा) का संयोजक पुष्पकमल दाहाल ९प्रचण्ड० ले रास्वपा नेतृत्वको सरकारले मधेश र मधेशी जनतामाथि पहिलो प्रहार गरेको टिप्पनी गरेका छन् ।
शुक्रबार जनकपुर विमानस्थलमा सञ्चारकर्मीहरुसंग कुरा गर्दै संयोजक प्रचण्डले मधेशी जनताले आशावादी भएर जिताएको रास्वपा नेतृत्वको सरकारले सबैभन्दा बढी पीडा मधेश र मधेशवासीलाई नै दिएको बताए ।
सरकारले यहाँका गरीब, मजदुर, किसानमाथि नै प्रहार गरेको प्रचण्डको भनाई छ । मधेशसंग जोडिएका भारतका सीमानाकाको रक्षा गर्दै आएका मधेशी जनतालाई नै भारतबाट सामान ल्याउँदा कर लगाउने सरकारको नीतिप्रति आपत्ति जनाए ।
प्रधानमन्त्री बालेन्द्र साहले आफ्नो एक अभिव्यक्तिमा नेपालले भारतको सीमा मिचेको भनेको नै मधेशी जनतालाई लक्षित गरी भनिएको प्रचण्डले बताए । प्रधानमन्त्री बालेनको सो अभिव्यक्तिले मधेशी जनताको अपमान गरेको प्रचण्डले उल्लेख गरे ।
मधेशी जनताले मधेशको छोरो प्रधानमन्त्री हुने भनेर विश्वासका साथ दिएको भोटले उल्टै मधेशी जनतामाथि नै प्रहार भएको उनले बताए ।
सरकारको बजेटर र नियुक्ति पनि मधेशको विरुद्धमा रहेको प्रचण्डको भनाई छ । समय बितेसंगै मधेशका जनताले गलत ठाउँमा भोट दिएको भन्ने समिक्षा गर्ने प्रचण्डले बताए । संयोजक प्रचण्डले अब फेरि जेनजी युवाहरुले यो सरकारको विरोधमा विद्रोह गर्ने दाबी गरे ।
सरकार मधेशी जनता विरोधी रहेको महशुस गरेकै कारणले अहिले रास्वपाकै सांसदहरु सरकारको विरोधमा लागेको उनले बताए । मधेशका मन्त्रीहरुलाई अपमान गरेर हटाइनु, मधेशी जनताले पक्कै बुझ्नेछ र चाँडै मधेशी जनताले सरकारको विरोधमा उत्रिने प्रचण्डले उल्लेख गरे ।
