रोयल इन्फिल्डको आधिकारिक बिक्रेता अल्फा अटोमोटिभले नेपाली बजारमा नयाँ मोटरसाइकल ‘गुरिल्ला ४५०’ सार्वजनिक गरेको छ । कम्पनीले रोयल इन्फिल्डको नयाँ मोडल ‘गुरिल्ला ४५०’ तीन वटा भेरियन्टमा नेपाली बजारमा ल्याएको हो ।
एपेक्स, ड्यास र फ्ल्यास भेरियन्टमा गुरिल्ला ४५० उपलब्ध रहेको कम्पनीले जानकारी दिएको छ । कम्पनीका अनुसार दैनिक सहर यात्रा, घुमाउरा सडक तथा लामो दूरीका राइडलाई लक्षित गर्दै तयार गरिएको यो मोटरसाइकलले रोडस्टर सेग्मेन्टमा नयाँ अनुभव दिने छ ।
रोयल इन्फिल्डका सार्क बिजनेस हेड दिपक काकरले नेपालमा गुरिल्ला ४५० सार्वजनिक हुनु कम्पनीका लागि महत्वपूर्ण उपलब्धि भएको बताए । उनले भने, ‘ नेपालमा गुरिल्ला ४५० सार्वजनिक गर्नु हाम्रो लागि उत्साह जनक कदम हो, यो मोटरसाइकल विशेषगरी नेपालको सडकका लागि बनाइएको हो, चुस्त, सहज र दमदार पर्फमेन्स भएको यो मोटरसाइकल स्पोर्टी राइडिङ मन पराउने ग्राहकका लागि यो उत्कृष्ट विकल्प बन्नेमा हामी विश्वस्त छौं ।’
गुरिल्ला ४५० मा ४५२ सीसीको सिंगल सिलिन्डर लिक्विड–कुल्ड इन्जिन प्रयोग गरिएको छ । यसले ८,००० आरपीएममा ४० पीएस पावर र ५,५०० आरपीएममा ४० एनएम टर्क उत्पादन गर्छ । कम्पनीका अनुसार ८५ प्रतिशत भन्दा बढी टर्क ३,००० आरपीएमबाटै उपलब्ध हुने भएकाले शहरदेखि हाईवे सबै प्रकारका सडकमा सहज परफर्मेन्स दिनेछ ।
यो मोटरसाइकलमा ६–स्पिड गियरबक्स रहेको छ । स्लिप क्लच, राइड–बाइ–वायर प्रविधि तथा ‘स्पोर्ट’ र ‘स्ट्रिट’ गरी दोरी राइडिंग मोड यो मोटरसाइकल उपलब्ध रहेको कम्पनीले बताएको छ । मोटरसाइकलका सबै भेरियन्टमा रोयल इन्फिल्डको ४ इन्च टीएफटी ‘ट्रिपर ड्यास’ उपलब्ध हुनेछ, जसमा गुगल नक्सा–सञ्चालित नेभिगेसन र सिमलेस स्मार्टफोन जडान सुविधा समावेश छ ।
कम्पनीले तीन वटै भेरियन्टको मूल्य ८ लाख ९९ हजार रुपियाँ तोकेको छ । साथै, कम्पनीले गुरिल्ला ४५० को बुकिङ खुला भइसकेको र नेपालभर रोयल इनफिल्डका शोरुम उपलब्ध रहेको कम्पनीले जनाकारी दिएको छ ।
