२८ कात्तिक, वीरगञ्ज । सत्ता गठबन्धनका दुई दल एमाले र नेपाली कम्युनिस्ट पार्टीले समर्थन फिर्ता लिएपछि अल्पमतमा परेका मधेश प्रदेशका मुख्यमन्त्री कृष्णप्रसाद यादवले पदबाट राजीनामा दिएका छन्।
प्रदेशसभाबाट विश्वासको मत प्राप्त गर्ने सम्भावना कमजोर बनेपछि मुख्यमन्त्री यादवले शनिबार प्रदेशसभा बैठकमा सम्बोधन गर्दै राजीनामाको घोषणा गरेका हुन्।
नेपाली कांग्रेस नेतृत्वको सरकारमा सहभागी एमालेका चार मन्त्रीले गत असोज २५ गते सामूहिक राजीनामा दिँदै सरकारलाई दिएको समर्थन फिर्ता लिएका थिए। त्यसपछि नेपाली कम्युनिस्ट पार्टीका चार मन्त्रीले पनि कात्तिक २० गते पदबाट राजीनामा दिएका थिए।
१०७ सदस्यीय मधेश प्रदेशसभामा सरकार गठनका लागि कम्तीमा ५४ सांसदको समर्थन आवश्यक हुन्छ। प्रदेशसभामा कांग्रेसका २२, एमालेका २३, जसपा नेपालका २७, नेपाली कम्युनिस्ट पार्टीका १५ र जनमत पार्टीका १२ सांसद छन्। यस्तै, सङ्घीय समाजवादी पार्टी र राष्ट्रिय प्रजातन्त्र पार्टीका एक एक सांसद रहेका छन्।
